Da znèin la zurnèda,
a la pasèva sla strèda,
sa di burdèll cume mè
sèimpre prunt a zughè.
L’ éra ‘na strèda biènca,
sèinza vérd e qualche pènca,
d’instèda pu la éra,
tóta quanta una pulvrèra.
La pasèva ilé da nun,
l’autobòta de cumun,
la daquèva tót i dé,
per dè mòd da rèspirè.
Pina ad géra mèsta a sas,
un gni s’andéva a spas,
mo per zughé a palòun,
la andéva bninòun.
Te pòst dla rèda dó madun,
e sèinza schèrpi e calzitun
as fašèmie dal partidi,
ch’li n’éra mai finidi.
D’invèrne sal pscäli,
émie tót al schèrpi möli,
sla fanga finènt e’ znòc,
e nujèlt t un bèl pastròć.
Guaši tóti al nost’ zurnèdi,
al finiva sal sasèdi,
per barsàj tót i lampiun,
e la tèsta ad qualchedun.
Se un puraz us féva mèl,
il purtéva tl’uspidèl,
e per un pat fra d nun,
u n’èra stè nisun.
Quand che mè am šbuzèva,
zét zét a m’arangèva,
am lavéva tna mastlina:
aqua giaza e sapunina.
Epù me šbóz mès a nud,
al bagnéva se mi spud,
e a druvèva e’ fazulèt,
per fasèl béin da strèt.
Per scavidè la ragnèda,
an mi féva miga véda,
an pianzèva per e’ mèl
a séra fòrt da burdél.
Crès sla strèda a la fèin,
per mè l’è stè un bèin,
an mi sò miga arvinèd,
a sò sna malèduchèd!
Ivano Aurelio Muratori
ERO FORTE DA BAMBINO!
Da piccolo la giornata,/ la passavo sulla strada,/ con dei bambini come me,/ sempre pronti a giocare.
Era una strada bianca,/ senza verde e qualche panca,/ d’estate poi era,/ tutta una polveriera.
Passava lì da noi,/ l’autobotte del comune,/ innaffiava tutti i giorni,/ per dar modo di respirare.
Piena di ghiaia mista a sassi,/ non ci si andava a spasso,/ ma per giocare a pallone,/ andava benone.
Al posto della rete due mattoni,/ e senza scarpe e calzettoni,/ facevamo delle partite,/ che non erano mai finite.
D’inverno con le pozzanghere,/ avevamo tutti le scarpe bagnate,/ con la fanga fino al ginocchio,/ e noialtri in un bel pastrocchio.
Quasi tutte le nostre giornate,/ finivano con le sassate,/ per bersaglio tutti i lampioni,/ e la testa di qualcuno.
Se un poveraccio si faceva male,/ lo portavano all’ospedale,/ e per un patto fra noi,/ non era stato nessuno.
Quando io mi sbucciavo,/ zitto zitto mi arrangiavo,/ mi lavavo in una mastellina: acqua ghiaccia e saponina.
E poi la ferita messa a nudo,/ la bagnavo con la saliva,/ e adoperavo il fazzoletto,/ per fasciarla ben stretta.
Per evitare la litigata,/ non mi facevo mica vedere,/ non piangevo per il male,/ ero forte da bambino.
Crescere sulla strada alla fine,/ per me è stato un bene,/ non mi sono mica rovinato,/ sono solo maleducato.
