Se mèr ò un bòn rapòrt,
maj un šgherb e maj un tòrt,
a sém béin afiadèd,
cume dó inamurèd.
E nun a fém l’amór,
platònic mo sa furór,
sèinza rapòrt sesuèl,
listès una masa bèl.
As fašém di gran salut,
cumè di sórdomut,
mè sal mèni ai faz i gèst,
ló sal gl’jändi e’ fà e’ rèst.
Una mušica da bal,
ch’lat pòrta vèrs e’ šbal,
e sa quèla andém sè lés,
sa tènt ilé ch’is stupès.
As muvém in sintònia,
s’na magica puèšia,
ch’las mèt ad bòn umór,
e las nèina alma e cór.
Mè ai surid sl’ucét,
ai dég ch’u n’à da šmèt,
e ló s’un sòfie ad brèza,
um spèdès una carèza.
La è dolza e lam pièš,
tènt ch’ai faz bäca da bèš,
a vég che ló e’ gradès,
al mi mòsi u li capès.
As fašém di gran inchènt,
as ciapèm da tót i chènt,
pché ch’an si putém tuchè,
l’è un amór fat isé.
Ivano Aurelio Muratori
FACCIO L’AMORE COL MARE
Col mare ho un buon rapporto,/ mai uno sgarbo e mai un torto,/ siamo ben affiatati,/ come due innamorati.
E noi facciamo l’amore,/ platonico ma con furore,/ senza rapporti sessuali,/ lo stesso molto bello.
Ci facciamo dei gran saluti,/ come dei sordomuti,/ io con le mani gli faccio i gesti,/ lui con le onde fa il resto.
Una musica da ballo,/ che ti porta verso lo sballo,/ e con quella andiamo col liscio,/ con tanti lì che si stupiscono.
Ci muoviamo in sintonia,/ con una magica poesia,/che ci mette di buon umore,/ e ci culla anima e cuore.
Io gli sorrido con l’occhietto,/ gli dico che non deve smettere,/ e lui con un soffio di brezza,/ mi spedisce una carezza.
È dolce e mi piace,/tanto che le faccio bocca da baci,/ vedo che lui gradisce,/ le mie mosse le capisce.
Ci facciamo dei gran incanti,/ ci prendiamo da tutte le parti,/peccato che non ci possiamo toccare,/ è un amore fatto così.
