-Sa st’ àfa dla madòna,
at sò vnù a véda nòna,
t’ci biènca cmè un lanzól,
at pòrt a ciapè e’ sól.
T an fè miga fadiga
abrunzèt una muliga,
at pòrt mè a marèina,
t an ci sla caruzèina.
= Dai Ninèin t al sè,
cumè ch’a sò mèssa mè,
ò un custóm ch’un mi va,
a l’ò tòlt dièš an fà.
T’vó ch’a vènga sa té,
gióst per fèt vargugnè,
davènti ma tènta zèinta?
an sò miga una pézèinta!
– Nòna per quèst ai sò mè,
e’ custóm al vag cumprè,
ma té u ti vò e’ tanga,
che t’è la còsa länga.
Tan ci incóra da mušèo,
tat mèt só un bél parèo,
un caplin, jucèl a spèć,
ta l’imbérc qualche vèć.
= Dai Ninèin, lasa andè,
cl’è térd e ò da fè,
a marèina in dó pèz,
mèssa isé a faz ribrèz!
An pòs zèrt fè vèda al tèti,
tan li véd stal dä sulèti,
a só com una batlèrda,
a ne tròv un ch’um guérda!
-Perché it guèrda nòna,
u ti vò e’ perizòma,
de tanga pjó intrighènt,
isé ch’it fà òć birbènt.
= An l’azèt e’ tu invid,
a mòvme um si gònfia i pid,
s’al vèini varicoši,
sl’artrìta e l’artròši.
– Per sti mèl u jè la cura,
basta fè ‘na sabiadura,
la buša at la pripèr mè,
e tè stè mèzóra ilè.
= Mo sl’è isé Ninèin,
a véng, vèst che t ai tèin,
adès a vòj che t zura,
da cavém dòp cla mezóra.
Ivano Aurelio Muratori
NONNA VIENI AL MARE!
Con quest’afa della Madonna,/ ti son venuta a vedere nonna,/ sei bianca come un lenzuolo,/ ti porto a prendere il sole.
Non fai mica fatica,/ ad abbronzarti un po’/ ti porto io a marina,/ non sei sulla carrozzina.
Dai Ninein tu lo sai,/ come sono messa io,/ ho un costume che non mi va,/ l’ho comprato dieci anni fa.
Vuoi che venga con te,/ giusto per farti vergognare,/ davanti a tanta gente?/ non sono mica una pezzente.
Nonna per questo ci sono qui io,/ il costume lo vado a comprare,/ a te ti ci vuole il tanga,/ che hai la coscia lunga.
Non sei ancora da museo,/ ti metti su un bel pareo,/ un cappellino, gli occhiali a specchio,/ lo imbarchi qualche vecchio.
Su Ninein, lascia andare,/ che è tardi e ho da fare,/ a marina in due pezzi,/ messa così faccio ribrezzo!
Non posso certo far vedere le tette,/ no le vedi queste due solette?/ sono come una battilarda,/ non lo trovò uno che mi guardi!
Perché ti guardino nonna,/ ti ci vuole il perizoma,/ del tanga più intrigante,/ così che ti fanno l’occhio birbante.
Non l’accetto il tuo invito,/ a muovermi mi si gonfiano i piedi,/ con le vene varicose,/ con l’artrite e l’artrosi.
Per sti mali c’è la cura,/ basta fare una sabbiatura,/ la buca te la preparo io,/ e tu stai mezz’ora lì.
Ma se è così Ninein,/ vengo, visto che ci tieni,/ adesso voglio che giuri,/ di togliermi dopo quella mezz’ora.
