Vnì a Rémin st’instèda!
ch’ui n’è d ròba da véda,
al domus, i munumèint,
al ciši si divertimèint.
Un gn’è da zirché tènt,
d Rémin ui n’è una sultènt,
l’è tla basa Rumagna,
se mèr, säta la campagna.
E’ magnè l’è da nabab,
salèm, parsót e kebab,
mango, kiwi e ananas,
iqué un s’ dvèinta gras.
La nòta av la fém ròša,
s’a purtè dré la muròša,
la varnisa, la pnalessa,
a fém ‘na principessa.
Per chi e’ vò fè de spòrt,
u j’è la ròda zó se pòrt,
la zira nòta e dé,
un gn’è èlt che còrie dré.
Us pò andè in mònòpatin,
in biciclèta o si scatin,
tènimòdi u j’è la pèsta,
apòsta per jéquilibrèsta.
Dal dòni an stag a dì,
agl’jè cum ch’a li vlì
mòri, räsi, usigènèdi,
se rusèt e e’ smèlt ma dèdi.
Al ciapa e sól sla spiagia,
e ilé us tròva la bagia,
a gl’ja la pèla zà rustida,
pròunti per la movida.
Ivano Aurelio Muratori
VENITE A RIMINI QUEST’ ESTATE!
Venite a Rimini quest’ estate!/ che ce n’è di cose da vedere,/ le domus, i monumenti,/ le chiese coi divertimenti.
Non c’è da cercar tanto,/ di Rimini ce n’è una soltanto,/ è nella bassa Romagna,/ sul mare, sotto la campagna.
Il mangiare è da nababbi,/ salame, prosciutto e kebab,/ mango, kiwi e ananas,/ qui non si diventa grassi.
La notte ve la facciamo rosa,/ se portate dietro la morosa,/ la vernice, la pennellessa,/ facciamo una principessa.
Per chi vuole fare dello sport,/ c’è la ruota giù sul porto,/ gira notte e giorno,/ non c’è altro che corrergli dietro.
Si può andare in monopattino,/ in bicicletta o coi pattini,/ tanto c’è la pista,/ apposta per gli equilibristi.
Delle donne non sto a dire,/ sono come le volete,/ more, rosse, ossigenate,/ col rossetto e le unghie smaltate.
Prendono il sole sulla spiaggia,/ e lì si trova la bazza,/ hanno la pelle già arrostita,/ pronte per la movida.
