Che la caza la sia un spòrt,
an me ne séra miga incòrt,
e te bar du ch’a vag mè,
ui n’è sna un che e’ diš isé.
Ló l’è un cazadór,
an créd che sia un lavór,
e a ne sò cumè che faza
a fè un spòrt maza maza.
Mazè u n’è gióst,
ènc’ se ma ló ui dà góst,
de rèst pòc u j’ impòrta,
e’ göd a simnè la mòrta.
S’una s-ciòpa a sé bòti,
e’ spèra mal pasaròti,
mi lévre, mi culumbaz,
e dal vòlti un ciapa un caz.
E’ l’istès us fà du pali,
e’ racòunta un sac ad bali,
prudèzi da cazadór,
ch’lii fà béin pòc unór.
A j’ò dèt mè šburunaz:
ciò, se per mazè un raz,
tai tir sé bòti d s-cióp,
un ti pèr che sia tróp?
Arspòsta: si raz in fròta,
la s-ciòpa a la schèrg tóta,
e duvè ch’a ciap a ciap,
maj un raz u m’è scap.
La caza l’è un spòrt,
duvè ch’us còunta i raz mòrt,
e un brèv un ciapa a mièra.
Sé a jò dèt, bònaséra!
Ivano Aurelio Muratori
IL CACCIATORE
Che la caccia sia uno sport,/ non me ne ero mica accorto,/ e nel bar dove vado io,/ ce n’è uno solo che dice così.
Lui è un cacciatore,/ non credo che sia un lavoro,/ non lo so come faccia,/ a fare uno sport ammazza ammazza.
Ammazzare non è giusto,/ anche se a lui gli dà gusto,/ del resto poco gli importa,/ gode a seminare la morte.
Con un fucile a sei colpi,/ spara alle passere,/ alle lepri, ai colombacci,/ e a volte non prende un cazzo.
E lo stesso ci fa due palle,/ racconta un sacco di balle,/ prodezze da cacciatore,/ che gli fanno ben poco onore.
Ho detto allo sborone:/ dì, se per uccidere un uccello,/ tiri sei colpi di fucile,/ non ti sembra che sia un po’ troppo?
Risposta: con gli uccelli in frotte,/ il fucile lo scarico tutto,/ e dove prendo prendo,/ mai un uccello mi è scappato.
La caccia è uno sport,/ dove si contano gli uccelli morti,/ e uno bravo ne prende migliaia./ Sì gli ho detto, buonasera!
