L’an scòrs bòja dla frègna,
ò dè via un scról d lègna,
dòp che la Regiòun la gét,
da nu zènd i caminét.
A l’ò porta a San Marèin,
ma un ch’l’à e’ camèin,
jéra trènta quintèl,
a jò fat un bèl righèl.
Tót cla lègna ch’a jò las,
l’èra perché avéva e’ gas,
a pènseva: a stag tranquèl,
tènimòdi a jò quèl!
E dòp che mè ò dè rèta,
èc arvè una bulèta,
sè còst de gas da paura,
zinczèint euri ad fatura.
A vòj véda chi u la pèga,
La Regiòun, quii dla Lèga?
O piotòst a dég ma Draghi:
per favore me la paghi!
A sò mes pròpie béin,
sèinza lègna te camèin,
e’ gas che còsta isé tènt,
am schèld si furminènt?
Se per chèš fra qualche dé,
e’ gas e’ vèin manchè,
e la Rósia lan se dà,
a vòj savè cum ch’us fà?
Regiòun o non Regiòun,
mè davéra ch’an stag bòn,
da st’inghèp a vèng fóra,
a vag a tò la lègna incóra.
Ivano Aurelio Muratori
PRENDO LA LEGNA PER IL CAMINO
L’anno scorso, boia della fregna,/ ho dato via un sacco di legna,/ dopo che la Regione disse,/ di non accendere i camini.
L’ho portata a San Marino,/ a uno che ha il camino,/ erano trenta quintali,/ gli ho fatto un bel regalo.
Tutta quella legna che gli ho lasciato,/ era perché avevo il gas,/ pensavo sto tranquillo,/ tant c’ho quello.
E dopo che io ho dato retta,/ ecco arrivare una bolletta,/ col costo del gas da paura,/ cinquecento euri di fattura.
Voglio vedere chi la paga,/ la Regione, quelli della Lega?/ O piuttosto dico a Draghi:/ per favore me la paghi!
Sono messo proprio bene,/ senza legna per il camino,/ il gas che costa così tanto,/ mi scaldo coi fiammiferi?
Se per caso fra qualche giorno,/ il gas viene a mancare,/ perché la Russia non ce lo dà,/ voglio sapere come si fa?
Regione o non Regione,/ io davvero non sto buono,/ da st’inghippo vengo fuori,/ vado a prendere la legna ancora.
