A sò e’ stròlg ad Muntfiór,
a cnäs la mèrda da l’udór,
l’urtiga me de tat,
da la faza un ch’l’è mat.
A indvéin quèl ch’u jè d nòv,
s’u jè e’ sól o s’e’ piòv,
se un e’ stà béin o mèl,
sl’è ma chèša o tl’uspidèl.
A sò ènca un guaridór,
e sèinza laurèa da dutór,
a guarès la pòri zèinta,
che de mèl las lamèinta.
A la cur s’al mi mèni,
sèinza fè dal ròbi strèni,
sna d’impac e di salas,
e dal sfrèghi zó da bas.
Mè an sò un strigòun,
a guarès per da bòn,
tènt i bógn che i cal ti pid,
e jušèl intirizid.
Per ch’jà pèrs i cavél,
ò e’ rimèdie ènca per quèl,
una pumèda ch’a faz mè,
ch’la guarès in dó tré dé.
Mo per piašèr, per carità,
s’avì e’ covid nu vnì iquà,
che i virus a ni cumbat,
l’è n’argumèing ch’an trat.
A n’ò rimédie ad sòrta,
nu busè ma la mi pòrta,
ènzi stè da läng da e’ parag,
ch’ò pavura de cuntag.
Mè a sò sna un stròlg,
nu scambièm per un viròlog,
nu ciapèm per quel ch’an sò,
ch’a faz sna quèl ch’us pò.
Ivano Aurelio Muratori
L’ INDOVINO DI MONTEFIORE
Sono l’indovino di Montefiore,/ conosco la merda dall’odore,/ l’ortica dal tatto,/ dalla faccia uno che è matto.
Indovino quello che c’è di nuovo,/ se c’è il sole o se piove,/ se uno sta bene o male,/ se è a casa o all’ospedale.
Sono anche un guaritore,/ e senza laurea da dottore,/ guarisco la povera gente,/ che del male si lamenta.
La curo con le mie mani,/ senza fare delle cose strane,/ solo impacchi e dei salassi,/ e delle sfreghe giù da basso.
Io non sono uno stregone,/ guarisco per davvero,/ tanto i bugni che i calli nei piedi,/ e gli uccelli intirizziti.
Per chi ha perso i capelli,/ ho il rimedio anche per quello,/ una pomata che faccio io,/ che guarisce in due tre giorni.
Ma per piacere, per carità,/ se avete il covid non venite qua,/ che i virus non li combatto,/ è un argomento che non tratto.
Non ho rimedio di sorta,/ non bussate alla mia porta,/ anzi state lontano dal paraggio,/ che ho paura del contagio.
Io sono soltanto un indovino,/ non scambiatemi per un virologo,/ non prendetemi per quello che non sono,/ che faccio solo quello che si può.
