Iqué tla Rumagna basa,
ad sburun ui n’è ‘na masa,
e’ sarà l’èria o la tèra,
i véin só a mièra e mièra.
I n’è d’alèvamèint,
i crès spuntaniamèint,
i pèzga cume l’urtiga,
e in si supòrta miga.
E’ sburòun l’è èšagèrèd,
l’è un ch’un stà caghèd,
un pacòun, un gradas,
bòn da fè sultènt de cias.
Per tótt e’ péš ch’us dà,
e’ stà se caz du ch’e’ va,
amig, dòni e parèint,
il manda a mora d’azidèint.
Tènt ma ló un gn’ impòrta,
se la zèinta la ne supòrta,
béin gunfièd cum ch’l’è,
us la tira da per sè.
Nisun l’à tènta chèra,
da sintì cum ch’u li spèra,
e’ diš: ò fat quèl ò fat quèst,
ma ló un gni si réšést!
Per zunta l’è un sfazèd,
strafutèint e šgarbèd,
per fè véda ch’l’è e’migliór,
e’ pjó fòrt e pjó sgnór.
Pjó ad quà, pjó ad là,
u n’à un ménim d’umiltà,
la mudèstia un la cnäs,
ló l’è quèl ch’u l’à pjó gròs.
Ma chiunque l’è supèriòr,
dl’avuchèd, de dutór,
tènimòdi jè di puraz,
ló l’é ló, ch’jèlt i n’è un caz.
Quand e’ taca a zcär ad dòni
e’ fa ‘vni Crèst e Madòni,
tènt cal bèli quant cal bróti
ló u li à ciavèdi tóti.
Per la vanità e la bòria,
e’ zèrca un pòst tla stòria,
mo simbèin che sia sburòun,
u n’è maj un Napulèoun.
La zèinta ch’la n’è zéga,
lal lasa dì e las ne frega,
e’ sburòun pòst ch’u jè,
ènca ló l’à da campè!
Ivano Aurelio Muratori
LO SBORONE
Qui nella Romagna bassa,/ di sboroni ce ne sono molti,/ sarà l’aria o la terra,/ vengono su a migliaia.
Non sono di allevamento,/ crescono spontaneamente,/ pizzicano come l’ortica,/ e non si sopportano mica.
Lo sborone è esagerato,/ è uno che non sta cagato,/ hun paccone, un gradasso,/ capace solo di fare del chiasso.
Per tutto il peso che si dà,/ sta sul cazzo dove va,/ amici, donne e parenti,/ lo mandano a morir d’accdenti.
Tanto a lui non gliene importa,/ se la gente non lo sopporta,/ ben gonfiato com’è,/ se la tira da per sè.
Nessuno ha tanto piacere,/ di sentire come le spara,/ dice: ho fatto quello, ho fatto questo,/ a lui non si resiste!
Per giunta è uno sfacciato,/ strafottente e sgarbato,/ per far vedre che è il migliore,/ il più forte, il più signore.
Più di qua, più di là,/ non ha un minimo di umiltà,/ la modestia non la conosce,/ lui è quello che ce l’ha più grosso.
Quando comincia a parlare di donne,/ fa venire subito le Madonne,/ tanto le belle che le brutte,/ lui le ha chiavate tutte.
A chiunque è superiore,/ dall’avvocati al dottore,/ in ogni caso dei poveracci,/ lui è lui, gli altri non sono un cazzo.
Per la vanità e la boria,/ cerca un posto nella storia,/ ma sebbene che sia sborone,/ non è mai Napoleone.
La gente che non è cieca,/ lo lascia dire e se ne frega,/ lo sborone posto che c’è,/ anche lui deve campare.
