A sém sèimpre sóra ilé,/ sa Facebook tót e’ dé,/ u n’è che faza mèl,/ mo u n’è gnènca nurmèl.
L’è dal sét dla matèina,/ ch’la cminza la manfréina,/ a fém un pòst sè cafè,/ per augurè un bòn dé.
Chi ul rizév e’ mèt um pièš,/ per arspòsta e’ manda un bèš,/ cl’èlt béin cuntèint,/ ul ringrèzia s’un ént.
Un’ òra prima ad mèzdé,/ us fà i pòst se magné,/ us fà véda una rustida,/ e ui si scriv bòna aptida.
Quii chi la véd pustèda,/ j’arspònd bòna magnèda,/ sl’arzunta ad cumplimèint,/ ch’ j fà cume cumèint.
E pu de chènt dla séra,/ l’è la stesa tiritèra,/ i fà i pòst per dì téin bòta,/ e per dét, la bòna nòta.
Quii te lét ch’i dòrma zà,/ ad bònanòti i n’a sà,/ in si pò miga švigè,/ per arspònd grazie sé sé!
Us tira avènti in stè mòd,/ sa tótt ch’i rid e’ chi gòd,/ mè a dmand sna per savé,/ se quèst us cèma lavurè?
Ivano Aurelio Muratori
Siamo sempre sopra lì,/ su Facebook tutto il giorno,/ non è che faccia male,/ ma non è neanche normale.
È dalle sette della mattina,/ che comincia la manfrina,/ facciamo un post col caffè,/ per augurare buon giorno.
Chi lo riceve mette mi piace,/ per risposta manda un bacio,/ quell’altro ben contento,/ lo ringrazia con un altro.
Un’ora prima di mezzogiorno,/ si fanno i post sul mangiare,/ si fa vedere una arrostita,/ per augurare buon appetito.
Quelli che la vedono postata,/ rispondono buon pranzo,/ con l’aggiunta dei complimenti,/ che fanno nei commenti.
E poi dalla parte della sera,/ è la stessa tiritera,/ fanno i pòst per dire tieni botta,/ e per darti la buona notte.
Quelli nel letto che dormono già,/ di buonenotti ne hanno abbastanza,/ non si possono mica svegliare,/ per rispondere grazie sì sì!
Si tira avanti in questo modo,/ con tutti che ridono e godono,/ io chiedo solo per sapere,/ se questo si chiama lavorare?
